Dankie dat ons nog kan dankie sê
Hannes en Theresia Marren van Welgegund skryf:
Na die mees vreesaanjaende ondervinding in my hele lewe op 22 Junie, waarin ek in die loop van ’n vuurwapen en ’n wrede gesig moes vaskyk, en daar op my geskiet, en ek gewond is en deur die genade van Bo die huis kon bereik en waarna die aanvaller die vuurwapen op Theresia gerig het en sy die deur in sy gesig toegeklap het, wil ons net die volgende instellings en persone vir hul hulp en bystand bedank:
• Aan insp Gys Coetzee van die Suid-Afrikaanse Polisie Diens, dankie vir u flinke optrede. Nadat ek u gekontak het was die polisie gou op die toneel so ook die helikopter. Hulle het vertroue ingeboesem met hulle optrede. Vir almal wil ons net baie dankie sê.
• Aan die sekuriteitsmaatskappy Paracops, u reaksie was onverbeterlik. U het die toegangshek met u duplikaatsleutel oopgesluit en so aan ander toegang verleen. Op u kan beslis staatgemaak word. Ook wat betref u nagpatrollies, en ook weer toe die voordeur se veiligheidshek se slot vroeg Donderdag more 02:00 gebreek is. U was in bestek van minute na die alarm geaktiveer was weer by ons. Dankie ook vir die toestemming wat verleen is dat Lluwellyne Labuschagne by ons kon bly tot 05:30.
• Aan Lluwellyne, dankie dat jy aangebied het om ’n hele paar nagte by ons aan huis oor te slaap, dit word besonder waardeer.
’n Hele aantal sekuriteitsmaatskappye het my in die verlede genader om by hulle aan te sluit, maar na die week se bystand staan en val ons by Paracops.
• Aan Necsa Ambulansdiens, baie dankie vir die vervoer na Brits Medi-Kliniek, veral aan Joe van Staden met die stabilisering van die wond en die kalme en vriendelike optrede tydens die rit in die ambulans.
• Aan ons bure Tony en Rhona Taylor. Tony wat agter die ambulans aangery het en ons by die hospitaal bygestaan het en terug huistoe gebring het. Aan Roy Jacobson wat ’n oog oor alles by die huis gehou het tot met ons terugkoms, baie dankie vir sulke staatmaker bure.
• Aan al die ander bure en vriende in die omgewing, dankie vir die besoeke en bemoedigende boodskappe. Dankie aan Albert Rhörbeck vir die herstel van die veiligheidshek.
• Dankie aan dss Anton van Zyl en Werner Venter vir julle besoeke op die dag van die gebeurtenis en aan ds Venter vir die opvolgbesoeke. Julle bemoedigende boodskappe was soos water vir ’n verlepte plant - dit rig jou weer op en gee nuwe krag.
• Aan ons Hemelse Vader: ‘Onse Here, onse Redder so groot en magtig. U oorskou ons lewenspad. Dankie dat u ons lewens gespaar het. Vas kan ons op U vertrou, ja ons kan getuig, vas kan ons op U vertrou.

Back to Top                                                                            Back to Home

9 July 2009